बालकलाकारपछि नायक नायिका बनेका कलाकार, कोहीले सात महिनामा त कोहीले सात वर्षमा खेले फिल्म

बालकलाकारपछि नायक नायिका बनेका कलाकार, कोहीले सात महिनामा त कोहीले सात वर्षमा खेले फिल्म

काठमाडौं, कात्तिक ४ – भनिन्छ दिनको अवस्था बिहानीको घामले संकेत गर्छ । अर्थात शुभ दिनको संकेत बिहानीले गर्छ । यस्तै शुभ दिनको संकेत विहानी समयमै गर्ने केही कलाकारको बारेमा हामीले सामग्री तयार गरेका छौँ ।

जसले कलाकार बन्ने छनक कलिलै उमेरमा देखाएका थिए र सानैदेखि क्यामेराको अगाडि खेलेका थिए । ति कुन कुन कलाकार हुन्, जो बालकलाकारिता गर्दै आजको सिने उद्योगमा आफ्नो नाम उज्ज्वल गरेका छन् । तिनका बारेमा आज हामी चर्चा गर्दैछौँ ।

प्रियंका कार्की

अहिले एकछत्र राज गरिरहेकी अभिनेत्री प्रियंका कार्की पनि बाल कलाकार हुँदै अभिनयमा आएकी हुन् । तर यो कुरा उनका कमै फ्यानहरुलाई मात्रै थाहा होला । प्रियंकाले सात वर्षको उमेरमा सिनेमा महादेवीमा बाल कलाकारको रुपमा अभिनय गरेकी थिइन् । सात वर्षको उमेरमा अभिनय थालेकी उनी बाल कलाकार, मिस टिन र भिजे हुँदै सिनेमाकी नम्बर वान अभिनेत्री बनेकी छिन् ।

अनमोल केसी

अभिनेता भुवन केसीले छोरालाई बाल्यकालमै सिनेमा खेलाए । उनले छोरोलाई अभिनयमा नै ल्याउने सपना छोरो सानै हुँदादेखि देखेका थिए । पहिलो पटक भुवनले अनमोललाई सिनेमा ‘साथी म तिम्रो’ मा बाल कलाकारको रुपमा खेलाएका थिए ।

बाल्यकालदेखि नै अभिनय थालेका अनमोलले लिड अभिनेताको रुपमा ‘होस्टेल’ मार्फत सिनेमामा ब्रेक लिए । उनको ब्रेकले सिनेम जगतमा तहल्कै मच्चायो । होस्टेलपछि उनले जेरी, ड्रिम्स, गाजलुमा काम गरे उनले काम गरेका सबै सिनेमामा बक्स अफिसमा तहल्का मच्चाएका छन् । अहिले उनी सिनेमा ‘कृ’ को तयारीमा जुटीहेका छन् ।

निता ढुङगाना

नायिका निता ढुङगानाले पनि बालकलाकार मार्फत अभिनय यात्रा थालेकी हुन् । उनले बालकलाकारको रुपमा सिनेमा ‘मितिनी ’ मा काम गरेकी थिइन् ।

मितिनीमा नायिका रेखा थापको बाल्यकालको भूमिका निभाएकी उनले सिनेमा ‘किसान’ बाट लिड अभिनेत्रीको रुपमा अभिनय थालिन् । त्यसपछि उनले दर्जन भन्दा धेरै सिनेमामा मूख्य भूमिका निभाएकी छिन् । सानैदेखि अभिनयमा सक्रिय निता अभिनय मोहका कारण आफू अध्ययनमा पछि परेको बताउँछिन् । प्लस टु पछि अध्ययन अगाडि लान नसकेकी उनले बाल्यकालमै टेलिसिरियलमा पनि काम गरेकी थिइन् ।

सलोन बस्नेत

निर्माता, निर्देशक एवम् कलाकार सोभित बस्नेतका छोरा सलोन बस्नेतले पनि बालकलाकारको रुपमा अभिनय थालेका हुन् । उनले बालकलाकारको रुपमा सिनेमा सुपस्टार, आर्मी, हामी तीन भाइ लगायत दर्जनौँ सिनेमामा काम गरेका छन् ।

बाल कलाकारको रुपमा सबैको मन जितेका उनले सिनेमा होस्टेल मार्फत लिड अभिनेताको रुपमा सिनेमामा ब्रेक लिए । त्यसपछि उनले लिड अभिनेताको रुपमा आभाष, एउटा साथी लगायतका सिनेमामा काम गरेका छन् । सलोन कमिक रोलका लागि चर्चित छन् । सलोनले सात महिनाको उमेरदेखि क्यामेरा फेस गरेका हुन् । त्यस बखत उनले आफ्नै बुवाको सियिलका लागि क्यामेराफेस गरेका थिए ।

संयम पुरी

निर्देशक नारायण पुरीका छोरा संयम पुरी पनि बालकलाकारको रुपमा अभिनयमा आएका हुन् । बालकलाकारको रुपमा अभिनय थालेका उनी अहिले युवा पुस्ताको ढुकढुकी बनेका छन् ।

सिनेमा सायदबाट उनले सिनेमामा ब्रेक लिएका हुन् । अहिले संयम लिड अभिनेताको रुपमा पनि छाइरहेका छन् । संयमले बाल कलाकाको रुपमा आफ्नो मान्छे, दोमन, आफ्नो घर आफ्नै मान्छे, मेरो हजुर, कर्तव्य लगायत दर्जनौँ सिनेमामा काम गरेका छन् । संयमले मूख्य अभिनेताको रुपमा सायद, लव सब्, आभास, पुन्टे परेड लगायतका सिनेमामा काम गरेका छन् ।

रागिनी खड्गी

द्वन्द्व निर्देशक राजेन्द्र खड्गीकी छोरी रागिनी खड्गीले पनि बालकलाकारको रुपमा केही सिनेमामा काम गरेकी छिन् । बालकलाकारपछि उनले लिड अभिनेत्रीको रुपमा काम गरिन् तर त्यती राम्रो प्रतिक्रिया र सफलता भने पाइनन् । उनले सिसा, ब्रह्मा, लफडा, नथिङ इम्पोसिवल, कर्कस लगायतका सिनेमामा काम गरेकी छिन् ।

बालकलाकारपछि लिड भएर काम गरेका र सफलता पाएका कलाकारहरुको बारेमा हामीले यो सामग्री प्रस्तुत गर्‍यौँ । यि बाहेक पनि बालकलाकारको रुपमा मात्रै काम गर्नेहरु राज आचार्य, ईश्वरी प्रधान, निरक पौड्याल लगायतका कलाकाहरु पर्छन् । तपाईँलाई अन्य कलाकारहरुको बारेमा जानकारी भए तल कमेन्ट गर्न नभुल्नु होला ।